انسان کو جتنا اپنے ظاہر پر توجہ دینی چاہیے، اس سے زیادہ اپنے باطن پر غور کرنا چاہیے کیونکہ انسان کی روح اور نفس اصل ہیں اور بدن روحی حالات کی عکاسی کرتا ہے۔ قدیم زمانے سے دینی مدارس اور حوزات علمیہ میں یہ سنت رہی ہے کہ تمام علمی دروس اور مباحثات کے ساتھ درس اخلاق بھی رکھا جاتا ہے تاکہ طالب علم کے ظاہر کو آراستہ کرنے کے ساتھ اس کے باطن کو بھی اخلاق حسنہ سے مزین کیا جا سکے۔ اسی ضرورت کو پورا کرنے کے لیے مدارس علوم دینیہ کی ایک اہم اخلاقی کتاب، یعنی "آداب المتعلمین"، کے درس کا انعقاد کیا گیا ہے تاکہ علوم دینی کے شائقین علم حاصل کرنے کے آداب کو سیکھ سکیں۔ مولف کتاب کے بارے میں: خواجہ نصیر الدین طوسی، 597 ہجری میں طوس میں پیدا ہوئے، ساتویں صدی ہجری کے مشہور شیعہ فلسفی، متکلم، اور ریاضی دان تھے۔ انہوں نے اخلاق، منطق، فلسفہ، کلام، ریاضیات اور نجوم میں اہم تصانیف کیں، جن میں "اخلاق ناصری"، "تجرید الاعتقاد"، اور "زیج ایلخانی" شامل ہیں۔ مراغہ میں ایک رصدخانہ اور بڑی لائبریری کی بنیاد رکھی۔ مغل حکمران ہلاکو خان کے دربار میں بھی اہم کردار ادا کیا اور اسلامی ورثے کی حفاظت میں نمایاں خدمات انجام دیں۔